منهجية تحليل سؤال فلسفي .
دروس الفلسفة الثانية باكاوريا .
الإستعداد للإمتحان الوطني .
أولا بالنسبة لمستوى الفهم ( المقدمة ) .
شنو لي المطلوب منك تكتبو في هاد المرحلة .. لي مطلوب منك هو تكتب تمهيد على الموضوع لي كيعالجو السؤال الفلسفي .. وهذا من خلال التدرج ديالك مما هو عام وشامل .. إلى ما هو خاص ومحدد .. كيفاش ؟؟
يعني كيخصك تقوم بتأطير السؤال الفلسفي .. وهذا ساهل .. فا نتا كيخصك غير تحدد المفهوم لي كيعالجو السؤال ولي هو متضمن فيه .. وتعرف شنو هي الاشكالية لي كيثيرها هاد السؤال .. ولكن خليك مبدع في التمهيد والتأطير ديالك للسؤال الفلسفي .. ومتكونش غير مُقلد .. كيفاش زعماا ؟ يعني نتا مخاصكش تكتب ذوك المقدمات التقليدية لي كلشي حافظهم .. بحال أنك تقول يندرج السؤال الذي بين أيدينا ضمن مجزوءة الوضع البشري وبالتحديد ضمن مفهوم الشخص ( نفترضو السؤال كيعالج مفهوم الشخص ) الخ لا .. كيخصك تقول مثلا ..يطرح مفهوم الشخص مجموعة من الإشكاليات أمام كل باحث في الوضع البشري، على اعتبار أن مفهوم الشخص لا يتحدد باعتباره قناع يرتديه الشخص وقتما شاء .. لا .. فالشخص له هوية وذات تميزه عن غيره من الذوات الأخرى .... ومن بعد هادشي طرح الاشكاليات لي مرتبطة بهاد السؤال .. إلى كان السؤال كيعالج مثلا قيمة الشخص .. فهذا كيعني بلي كين عندنا زوج اشكاليات كيخصنا نعالجوهم في المناقشة .. الإشكال الأول ( هل الشخص غاية في ذاته ) .. الإشكال الثاني ( هل الشخص مجرد وسيلة ) ...
بالنسبة لمستوى التحليل والمناقشة .
شنو كيخصني نكتب .. أولا ناخدو التحليل .. السؤال كيختلف على القولة والنص .. فا السؤال مكيدافعش على شي تصور أو أطروحة معينة لا .. لذلك فا أنا مطلوب مني نقوم بتحليل مفاهيم السؤال ونستخلص الإشكاليات لي مرتبطة بهاد السؤال .. مفهمتش ؟
يعني كيخصك تحدد المفاهيم لي كينا في السؤال فا إلى كان السؤال كيتعلق بمفهوم الشخص وقيمته مثلا
فهذا كيعني بلي نتا قدام مفهوم الشخص .. ومفهوم القيمة .. هاد المفاهيم كيخصك تشرحها وتحدد العلاقة بيناتها .. ممكن تكتب مثلا .. لفهم السؤال بشكل جيد سنعمل على تحديد مفاهيمه وتفكيك مضامينه، فالشخص يحيل على الذات .. وعلى الجوهر الذي يُميزني عن غيري... أما القيمة فهي ميزة ذاتية تتحدد من خلال امتلاك العقل .. وإذا ما أنا أقررت بكوني لي قيمة فذلك يعني بأن للشخص الآخر كذلك قيمة ...... وتبدى تكلم على كيغاش هاد القيمة كتجلى في الآخر .. ومن تم ذكر العلاقة لي كتربط الشخص بالقيمة ..
السؤال كيضمن أطروحة مُفترضة .. يعني أطروحة مواضحاش فيه .. أطروحة إما كدافع على قيمة الشخص ( نفترضو كا مثال بلي السؤال كيعالج قيمة الشخص ) .. أو أطروحة كتنفي القيمة ديالو .. إلى كانت الأطروحة كتفترض بلي الشخص عندو قيمة فا نتا غادي تكتب من بعد تحليل ديالك للمفاهميم مايلي : " وبهذا فنحن أمام افتراض يذهب إلى إعتبار أن للشخص قيمة .. وتقوم بتوضيح هاد الأطروحة المفترضة من خلال الأساليب الحجاجية لي كدافع عليهم ثم طرح في مقابل هاد الأطروحة المُفترضة .. أطروحة نقيضة أي أطروحة كَتعارض معاها .. وهي أن الشحص مجرد وسيلة .... ممكن دافع على هاد الأطروحة من خلال أمثلة من الواقع .. تقول بلي الشخص في عالمنا اليوم لا قيمة له ( استعباد الشغل مثلا ولي كيخلي من الشخص مجرد وسيلة ... )
بالنسبة للمناقشة .
حاول تبداا بشي تصور كيدعم الأطروحة المُفترضة .. عاد تناقشها بأطروحات ومواقف مُعارضة .. ذْكر أوجه الإختلاف وأوجه التشابه ما بين الأطروحات المؤيدة لأطروحة السؤال المُفترضة .. والأطروحات المعارضة لها ..
متنساش بلي كيخصك دعم المواقف ديال الفلاسفة بالحجج ديال كل وحد فيهم كيفما كيخصك تبين مكامن الضعف والنقص لي فيهم كذلك .
ملاحظة : المناقشة مكتعنيش بلي نتا خاصك تستعرض المواقف فقط .. ولكن كيخصك تناقشهم .. وتبين بلي كين أخذ ورد في هاد النقاش ..
بالنسبة للتركيب أو الخاثمة.
فا لي مطلوب منك هو تلخص الأفكار لي توصلتي ليهم من خلال المناقشة ديالك ( باختصار شديد ) .. وتقول شي رأي خاص بيك .. وغادي يكون هاد الرأي مهم وعندو قيمة إلى قدرتي دعميه ببعض الحجج والمواقف ... " بالتوفيق " .
إرسال تعليق